[:en]ᓄᓇᕗᑦ ᑐᖖᒐᕕᒃᑯᑦ ᑎᒥᖓᑦ ᐃᓐᕼᐋᐱᑦ ᒦᑎᐊᒃᑯᓪᓗ, ᐱᓕᕆᖃᑎᒌᑦᑐᑎᒃ ᓴᖅᑮᒻᒪᑕ ᐃᑭᐊᖅᑭᕕᒃᑯᑦ ᐊᖏᕐᕋᒥ ᐃᓕᓐᓂᐊᕈᑕᐅᔪᓐᓇᖅᑐᒥᒃ[:iu]ᓄᓇᕗᑦ ᑐᖖᒐᕕᒃᑯᑦ ᑎᒥᖓᑦ ᐃᓐᕼᐋᐱᑦ ᒦᑎᐊᒃᑯᓪᓗ, ᐱᓕᕆᖃᑎᒌᑦᑐᑎᒃ ᓴᖅᑮᒻᒪᑕ ᐃᑭᐊᖅᑭᕕᒃᑯᑦ ᐊᖏᕐᕋᒥ ᐃᓕᓐᓂᐊᕈᑕᐅᔪᓐᓇᖅᑐᒥᒃ[:]

[:en]

www.nti-inhabit.com

(ᒫᑦᓯ 24, 2020) ᓄᓇᕗᑦ ᑐᖖᒐᕕᒃᑯᑦ ᑎᒥᖁᑖ ᐃᓐᕼᐋᐱᑦ ᒦᑎᐊᒃᑯᓪᓗ ᐃᓄᖕᓂᒃ ᓱᕈᓯᕐᓂᒃ ᒪᒃᑯᒃᑐᓂᒡᓗ ᐊᑐᐃᓐᓇᖃᖁᔨᖕᒪᑕ ᐅᖃᓕᒫᒐᑦᑎᐊᕙᖕᓂᒃ ᐃᓕᓐᓂᐊᕐᓂᕐᒧᓪᓗ ᐱᓕᕆᔾᔪᑎᓂᒃ ᐊᖏᕐᕋᒥ ᐃᓕᓐᓂᐊᕈᓐᓇᖁᓪᓗᒋᑦ. ᑕᐃᒫᒃ ᐱᔭᕆᐊᖃᓪᓚᕆᓕᕐᒪᑕ  ᓄᕙᖕᓇᖅ-19 ᐱᔾᔪᑎᒋᓪᓗᒍ ᐃᓕᓐᓂᐊᕐᕖᓪᓗ ᒪᑐᔭᐅᓯᒪᓂᖏᑕ ᓄᓇᕗᒻᒥ, ᓄᓇᕗᑦ ᑐᖖᒐᕕᒃᑯᑦ ᑎᒥᖁᑖᑦ ᐃᓐᕼᐋᐱᑦ ᒦᑎᐊᒃᑯᓪᓗ ᐱᓕᕆᖃᑎᒌᑦᑐᑎᒃ ᐃᓄᒃᑑᖅᑐᓂᒃ ᐅᖃᓕᒫᒐᕐᓂᒃ ᐊᑐᐃᓐᓇᐅᑎᑦᑎᓕᕐᒪᑕ ᐃᑭᐊᖅᑭᕕᒃᑯᑦ ᐅᕘᓇ https://nti-inhabit.com

ᓄᓇᕗᑦ ᑐᖖᒐᕕᒃ ᐱᓕᕆᖃᑎᖃᖅᑐᑎᒃ ᐃᓐᕼᐋᐱᑦ ᒦᑎᐊᒃᑯᓐᓂᒃ ᐃᓄᖕᓂᓪᓗ ᐃᓕᓐᓂᐊᖅᑎᑦᑎᔨᓂᒃ ᐃᓕᓐᓂᐊᕈᑎᓂᒃ ᐱᓕᕆᔾᔪᑎᓂᒃ ᐃᓄᒃᑎᑐᑦ ᑎᑎᖅᑭᕆᔾᔪᑎᓂᒡᓗ ᓴᓇᒻᒪᑕ ᐊᖏᕐᕋᒥ ᐱᓕᕆᐊᖑᔪᓐᓇᖅᑐᓂᒃ. ᐱᓇᓱᐊᕈᓯᑕᒫᑦ ᑕᒪᓐᓇ ᑐᐊᕕᕐᓇᖅᑐᖅ ᐊᑐᖅᑎᓪᓗᒍ ᓄᑖᓂᒃ ᐅᖃᓕᒫᒐᕐᓂᒃ ᐱᓕᕆᔾᔪᑎᓂᒡᓗ ᓴᑮᖃᑦᑕᕐᓂᐊᖅᑐᑦ ᐃᑲᔪᖅᓱᕈᒪᓪᓗᒋᑦ ᓄᓇᕗᒻᒥᐅᑦ ᐅᖃᐅᓯᖅᐳᑦ ᓴᖖᒋᔫᖏᓐᓇᕐᓂᐊᕐᒪᑦ.

“ᓄᓇᕗᑦ ᑐᖖᒐᕕᒃᑯᑦ ᑎᒥᖅᑯᑖᑦ ᐅᐱᒍᓱᒃᐳᑦ ᐃᑲᔪᕐᓂᐊᕐᒪᑕ ᐃᓄᒃᑐᑦ ᐃᓕᓐᓂᐊᕐᓂᕐᒥᒃ, ᐃᓚᒌᓂᒃ ᑲᑎᖖᒐᑎᑦᑎᒃᑲᓐᓂᕐᓗᑎᒃ ᐊᖏᕐᕋᖅᓯᒪᔪᓐᓇᑦᑎᐊᖁᓪᓗᑕ.” – ᐊᓗᑭ ᑰᑦᑎᖅ, ᓄᓇᕗᑦ ᑐᖖᒐᕕᒃᑯᑦ ᑎᒥᖁᑖ.

“ᐊᖏᕐᕋᒥ ᐃᓕᓐᓂᐊᕐᓂᕐᒥᒃ ᐃᑲᔪᖅᓱᕈᒪᒐᑦᑕ, ᑲᔪᖏᖅᓴᐃᓗᑕᓗ ᐃᓄᖕᓂᒃ ᐱᓕᕆᖃᑎᖃᑦᑎᐊᕐᓗᑕ ᓴᖖᒋᑦᑎᖁᓪᓗᒍ ᐅᖃᐅᓯᖅᐳᑦ.” – ᓗᐃᔅ ᕝᓛᕼᐅᕐᑎ, ᐃᓐᕼᐋᐱᑦ ᒦᑎᐊ

ᓄᓇᕗᑦ ᑐᖖᒐᕕᒃᑯᑦ ᑎᒥᖁᑖᑕ ᒥᒃᓵᓄᑦ (NTI):

ᓄᓇᕗᑦ ᑐᖖᒐᕕᒃᑯᑦ ᑎᒥᖅᑯᑖ ᐊᐅᓚᑦᑎᕙᒃᐳᖅ ᑲᒪᓪᓗᓂᓗ ᐃᓄᐃᑦ ᐱᓕᕆᐊᖏᓐᓂᒃ ᓄᓇᕗᑦ ᐊᖏᕈᑎᖏᓐᓃᑦᑐᓂᒃ ᒐᕙᒪᑐᖃᒃᑯᑦ ᓄᓇᕗᒻᒥᓪᓗ ᒐᕙᒪᐃᑦ ᐱᔭᒃᓴᖏᑦ ᑲᔪᓯᑎᑕᐅᖁᓪᓗᒋᑦ.

ᐃᓐᕼᐋᐱᑦ ᒦᑎᐊᑉ ᒥᒃᓵᓄᑦ:

ᐃᓐᕼᐋᐱᑦ ᒦᑎᐊ ᑎᒥᖁᑖ ᐃᓄᖕᒧᑦ ᓇᒻᒥᓂᕆᔭᐅᔪᖅ ᐅᖃᓕᒫᒐᓕᐅᕐᕕᒃ ᓴᖅᑯᒪᑎᑦᑎᕙᒃᑐᖅ ᓴᐳᒻᒥᓪᓗᓂᓗ ᐅᓂᒃᑳᓂᒃ, ᖃᐅᔨᒪᓂᕐᒥᒃ, ᐅᑭᐅᖅᑕᖅᑑᑉ ᓄᓇᖏᓐᓃᖖᒑᑐᓂ. ᐱᔾᔪᑎᕗᑦ ᓴᖅᑯᒪᑎᓪᓗᒍ ᖃᐅᔨᓴᕐᓂᒃᑯᑦ ᐃᓄᐃᑦ ᓄᓇᕗᒻᒥᐅᑦ ᐅᒃᐱᕆᔭᖏᑦ ᐅᓂᒃᑳᖅᑐᐊᖏᑦ ᖃᐅᔨᒪᓂᖏᓪᓗ. ᑎᑎᕋᖅᑎᕗᑦ, ᐅᓂᒃᑳᖅᑐᐊᖅᑎᕗᑦ, ᑕᑯᒥᓇᖅᑐᓕᐅᖅᑎᕗᓪᓗ ᑕᒪᒃᑯᓂᖓ ᖃᐅᔨᒪᔭᐅᔪᓂᒃ ᐱᖖᒍᖅᑎᑦᑎᕙᒃᐳᑦ ᐊᑐᐃᓐᓇᐅᖁᓪᓗᒋᑦ ᐅᖃᓕᒫᖅᑎᓄᑦ ᐃᓄᐃᑦ ᓄᓇᖏᓐᓂᑦ ᓇᐹᖅᑐᓕᖕᒥᐅᓪᓗ ᓄᓇᖏᓐᓂᒃ ᑲᓇᑕᒥ. ᓄᓇᕗᒻᒥ ᓴᖅᑮᔨᐅᓪᓗᑕ ᓇᒻᒥᓂᖅᓱᖅᑐᒍᑦ, ᐅᑭᐅᖅᑕᖅᑑᑉ ᐅᓂᒃᑳᖏᓐᓂᒃ ᓯᓚᑐᓂᖏᓐᓂᒡᓗ ᓯᓚᕐᔪᐊᕐᒥᐅᓂᒃ ᑐᓴᖅᑕᐅᖁᔨᕗᒍᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓄᓇᕗᑦ ᑐᖖᒐᕕᐅᑉ ᑎᒥᖁᑖᑕ ᒥᒃᓵᓄᑦ, ᖃᐅᔨᒋᐊᕆᑦ ᒪᓚᐃᔭ ᒥᑭᔾᔪᒻᒧᑦ mmikijuk@tunngavik.com

ᑐᑭᓯᒋᐊᒃᑲᓂᕈᒪᒍᕕᑦ ᐃᓐᕼᐋᐱᑦ ᒦᑎᐊ ᒥᒃᓵᓄᑦ, ᖃᐅᔨᒋᐊᕆᑦ ᐱᐊ ᕝᓛᒥᓐᑦ pia.flamand@inhabitmedia.com

https://nti-inhabit.com

 [:]