ᐅᓂᒃᑳᕐᓂᕆᓂᐊᖅᑕᕋ ᑲᑐᔾᔨᓂᒃᑯᑦ ᑭᒡᒐᑐᐃᓪᓗᖓ ᑐᓐᖓᕕᒃᑯᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ, ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ (ᑖᒃᑯᐊ ᐃᓄᐃᑦ ᑲᑐᔾᔨᖃᑎᒌᖏᑦ) ᐊᒻᒪᓗ ᑐᓴᐅᒪᑎᑕᐅᓂᒃᑯᑦ ᐅᖃᐅᓯᐅᖃᑦᑕᕐᓯᒪᔪᓂᒃ ᓄᓇᕗᒻᒥᐅᓄᑦ.

ᐅᓪᓗᒥ ᐅᖃᓕᒪᕕᒋᔭᑦᓯ ᑭᒡᒐᑐᐃᓪᓗᖓ ᓄᓇᕗᒻᒥ ᐃᓄᓐᓂᒃ.

ᒐᕙᒪᒃᑯᑦ ᓴᒃᑯᐃᖁᒐᑦᑎᒍ ᐱᖁᔭᒃᓴᖅ 25-ᒥᒃ.

(ᐊᑕᖏᕐᓗᒍ ᐅᖃᓕᒫᕈᒃ)

ᓇᑭᓐᖔᕐᓂᖏᑦ

ᐃᓕᓐᓂᐊᕐᓂᖅ ᖁᐊᕐᓵᓇᖅᑐᒦᒍᑕᐅᒻᒪᑦ ᓄᓇᕗᒻᒥ. ᓄᓇᕗᑦ ᒐᕙᒪᒃᑯᖏᑦ ᐊᐅᓚᑦᓯᑦᓯᐊᖃᑦᑕᕐᓯᒪᓐᖏᒻᒪᑕ ᐃᓕᓐᓂᐊᓂᕐᒧᑦ ᐱᔨᑦᓯᕈᑎᓂᒃ ᓄᓇᕗᒻᒥ ᐃᓕᓐᓂᐊᖅᑎᓄᑦ, ᑕᑯᑦᓴᐅᔪᖅ ᑕᒪᓐᓇ ᐃᓕᓐᓂᐊᕆᐊᑦᓯᐊᖃᑦᑕᖏᓐᓂᒃᑯᑦ ᐊᒻᒪᓗ ᐊᓂᑕᐅᑐᐃᓐᓇᖃᑦᑕᖅᑐᑦ ᖁᑦᓯᑐᒻᒪᕆᐅᑎᓪᓗᒋᑦ.

ᐊᐅᓚᑦᓯᒍᑕᐅᔪᖅ ᑲᑕᑦᑎᑦᓯᓯᒪᔪᖅ 70% ᐃᓕᓐᓂᐊᖅᑎᖁᑎᑦᑎᓐᓂᒃ ᐃᓕᓐᓂᐊᕌᓂᖃᑦᑕᖏᑦᑐᑎᒍᑦ 12-ᒥᒃ ᓇᓗᓇᐃᒃᑯᑕᖅᑖᖃᑦᑕᖏᑦᑐᓄᑦ ᒫᓐᓇ ᐊᐅᓚᓂᐅᔪᒃᑯᑦ.

ᓄᓇᕗᑦ ᒐᕙᒪᒃᑯᖏᑦ, ᑐᓐᖓᕕᒃᑯᑦ ᐊᒻᒪᓗ ᐊᓯᖏᑦ ᑐᓴᓕᖅᑭᑦᑖᓚᐅᖅᑐᑦ, ᓄᓇᕗᒻᒥ ᐃᓄᐃᑦ ᑕᑯᔪᒪᔪᑦ ᐃᓄᒃᑐᑦ ᐅᖃᐅᓯᖅ ᐃᓕᓴᐃᔾᔪᑎᓪᓗᐊᑕᐅᖁᓪᓗᒍ ᐃᓕᓐᓂᐊᕕᑦᑎᓐᓂ (K-12), ᐃᓚᒋᔭᐅᓗᑎᒃ ᑐᕌᖓᓂᕐᓴᓂᒃ ᐃᓕᓴᐃᔾᔪᑎᖃᖃᑦᑕᕐᓂᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᐊᒻᒪᓗ ᓇᓕᖅᑯᑦᓯᔪᒥᒃ ᐃᑲᔪᖅᑕᐅᓗᑎᒃ ᐊᒻᒪᓗ ᓈᖕᒪᑦᑐᒥᒃ ᓂᕆᐅᒋᔭᖃᕐᓗᑎᒃ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ, ᐊᑕᖐᔪᒥᒃ ᐃᓕᓐᓂᐊᕈᑎᑕᖃᖁᓪᓗᒍ ᐅᔾᔨᕆᔭᐅᒋᐊᖃᕐᓂᖓᒍᑦ.

ᓄᓇᕗᑦ ᒐᕙᒪᒃᑯᖏᑦ ᒫᓐᓇ ᐊᒻᒪᓗ ᐊᐅᓚᓂᖃᕈᒪᓂᖏᑎᒍᑦ ᐃᓕᓐᓂᐊᓂᕐᒧᑦ ᓇᓕᖅᑯᑦᓯᖏᒻᒪᑕ ᐱᖕᒪᕆᐅᑎᑕᐅᔪᓂᒃ ᓄᓇᕗᒻᒥ ᐃᓄᓐᓄᑦ, ᓄᓇᕗᒻᒥᐅᓄᑦ.

ᑭᓯᐊᓂᓕ, ᒐᕙᒪᒃᑯᑦ ᐆᒪᑎᑦᓯᒍᑎᒃᓴᕐᓯᐅᑐᐃᓐᓇᕐᒪᑕ ᓴᓐᖏᓂᕐᒥᒃ ᓈᖕᒪᖏᑦᑐᒥᒃ ᐃᓕᓐᓂᐊᓂᕐᒧᑦ ᐊᑐᐊᒐᕐᓄᑦ, ᐱᓕᕆᐊᒃᓴᓄᑦ ᐊᒻᒪᓗ ᐃᓕᓐᓂᐊᕈᑎᒃᓴᓄᑦ ᐊᒻᒪᓗ ᐅᖃᐅᓯᕐᒧᑦ ᐃᓕᓴᐃᔾᔪᑎᒃᓴᒧᑦ ᑕᒪᓐᓇ ᐱᓗᖅᑯᑕᐅᔪᖅ ᓵᑕᒃᓴᐅᖏᓐᓂᕐᒥᒃ, ᓴᖅᑭᔮᖏᓐᓂᕐᒥᒃ ᐊᒻᒪᓗ ᓈᖕᒪᖏᓐᓂᕐᒥᒃ.

ᑕᒪᓐᓇ ᐃᑲᔫᑎᖃᔾᔮᖏᑦᑐᖅ ᐃᓕᓐᓂᐊᖅᑎᖁᑎᑦᑎᓐᓄᑦ, ᐃᓄᖁᑎᑦᑎᓐᓄᑦ ᐅᑉᕙᓘᓐᓃᑦ ᐊᐅᓚᑕᐅᔪᓄᑦ.

ᓄᓇᕗᑦ ᓴᖅᑭᖅᑕᐅᓚᐅᖅᑐᖅ ᐃᓄᓐᓂᒃ ᐃᓄᓐᓄᑦ. ᐅᖃᐅᓯᖅ ᐱᔾᔪᑎᓪᓗᐊᑕᐅᓪᓗᓂ ᐃᓄᓐᓄᑦ ᐃᖅᑲᓇᐃᔭᕈᑕᐅᓗᓂ ᑐᕌᖓᔪᒥᒃ ᑎᑭᐅᑎᒍᑎᒃᓴᒥᒃ ᓄᓇᑖᕐᓂᕐᒧᑦ ᐊᖏᕈᑎᓄᑦ.

ᐃᓄᐃᑦ ᑕᑯᓐᓇᒐᖃᓚᐅᖅᑐᑦ ᐱᐅᓂᕐᓴᐅᓂᐊᕐᓂᖏᓐᓂᒃ ᐱᔨᑦᓯᕈᑏᑦ ᐱᓕᕆᐊᒃᓴᓪᓗ, ᐃᓚᒋᔭᐅᓪᓗᓂ ᐱᐅᓂᕐᓴᐅᓗᓂ ᐃᓕᓐᓂᐊᕐᓂᖓ ᐃᓄᐃᑦ ᓄᑕᖅᑲᑦ − ᐃᒫᒃ, ᐃᓕᓐᓂᐊᑎᑦᓯᒍᑕᐅᓗᓂ ᐅᖃᐅᓯᑦᑎᒍᑦ, ᐊᒻᒪᓗ ᑖᒃᑯᓇᓐᖔᕐᓗᓂ ᐃᓄᐃᑦ ᖃᐅᔨᒪᒍᓯᖏᓐᓂᒃ, ᐃᓅᓂᖏᓐᓂᒃ ᐊᒻᒪᓗ ᑐᑭᓯᐊᓂᖏᓐᓂᒃ.

ᐊᐅᓚᑦᓯᒍᑕᐅᔪᖅ ᑕᑉᕙᖔᕐᓯᒪᓗᓂ ᐱᖕᒪᕆᐅᔪᖁᑕᐅᔪᓂᒃ ᐊᒻᒪᓗ ᓯᕗᓪᓕᐅᔾᔭᐅᖁᔭᐅᔪᓂᒃ ᐃᓄᖏᓐᓄᑦ ᓄᓇᖃᖅᑐᓄᑦ.

ᐃᓄᐃᑦ ᐱᔪᓐᓇᐅᑎᓖᑦ ᓇᖕᒥᓂᖅ−ᐊᐅᓚᑦᓯᒍᓐᓇᓂᕐᒧᑦ ᐊᒻᒪᓗ ᓇᖕᒥᓂᖅ−ᒐᕙᒪᖃᕐᓂᕐᒧᑦ ᐃᓕᓐᓂᐊᓂᕐᒨᖓᔪᓂᒃ.

ᐃᓄᐃᑦ ᒫᓐᓇ ᐅᖃᐅᓯᕐᒧᑦ ᐱᔪᓐᓇᐅᑎᓖᑦ, ᓴᖅᑭᔮᑦᓯᐊᖅᑐᑦ ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᐱᖁᔭᖏᓐᓂ ᓄᓇᕗᒻᒥ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᑎᔭᐅᓯᒪᓂᖓᓄᑦ ᐱᖁᔭᓂᒃ.

ᑖᒃᑯᐊ ᐱᔪᓐᓇᐅᑏᑦ ᐃᓕᓴᕆᔭᐅᓯᒪᒋᐊᓖᑦ, ᓴᐳᔾᔭᐅᓯᒪᓗᑎᒃ, ᐃᑉᐱᒋᔭᐅᑦᓯᐊᕐᓗᑎᒃ ᐊᒻᒪᓗ ᐱᕙᓪᓕᐊᒍᑕᐅᓗᑎᒃ.

ᓱᕈᓯᓕᒫᑦ, ᐃᓚᒋᔭᐅᓪᓗᑎᒃ ᐃᓄᐃᑦ ᓱᕈᓯᖏᑦ, ᐊᑐᐃᓐᓇᖃᕆᐊᖃᕐᒪᑕ ᐃᓕᓐᓂᐊᕈᑎᒃᓯᐊᕙᓐᓂᒃ ᐃᑲᔫᑎᓕᓐᓂᒃ ᑎᑭᐅᑎᒍᑎᒋᓂᐊᖅᑕᖏᓐᓂᒃ ᐊᔾᔨᒌᓐᖏᑦᑐᓄᑦ ᐊᑐᕆᐊᓕᖏᓐᓄᑦ ᐃᑲᔪᖅᑕᐅᒍᑎᒋᓗᒋᑦ, ᑭᒡᒍᑕᐅᔪᒃᑯᑦ ᐊᒻᒪᓗ ᐃᑉᐱᒋᔭᐅᑦᓯᐊᕐᓗᑎᒃ;

  • ᐃᓄᒃᑐᑦ ᐅᖃᐅᓯᖅ ᐃᓕᓴᐃᒍᑎᓪᓗᐊᑕᖅ ᐃᓕᓐᓂᐊᖅᑏᑦ ᑎᑭᐅᑎᒍᓐᓇᖁᓪᓗᒋᑦ ᒪᕐᕉᓐᓂᒃ ᐅᖃᐅᓯᖃᕐᓗᑎᒃ ᐃᓕᓐᓂᐊᕕᓐᓂ ᓴᓐᖏᓂᖃᖅᑐᒥᒃ ᒪᕐᕉᓐᓂᒃ ᐅᖃᐅᓰᓐᓂᒃ ᐃᓕᓐᓂᐊᕈᑎᖃᕐᓂᖏᑦ ᒪᓂᒪᑎᑕᐅᓗᑎᒃ ᐊᐅᓚᑕᐅᔾᔪᑎᓪᓗᐊᑕᖏᓐᓂ ᐃᓕᓐᓂᐊᕈᑎᒃᓴᓕᐊᖑᖃᑦᑕᖅᑐᑦ ᐃᓕᓐᓂᐊᕆᐊᓕᕋᑖᖅᑐᓂᒃ ᐃᓕᓐᓂᐊᕐᓂᓕᓐᓄᑦ 12-ᒧᑦ;
  • ᐃᓄᐃᑦ ᕿᑐᕐᖓᓖᑦ ᐊᑐᕈᓐᓇᖁᓪᓗᒋᑦ ᐱᔪᓐᓇᐅᑎᒋᔭᒥᓂᒃ ᐱᐅᓂᕐᐹᒥ ᐃᓄᒃᑐᑦ ᐅᖃᐅᓯᕐᒥᒃ ᐃᓕᓐᓂᐊᖅᑎᑕᐅᒍᓐᓇᕐᓗᑎᒃ ᕿᑐᕐᖓᖏᑦ, ᓇᓕᖅᑯᑦᓯᓯᒪᔪᓂᒃ ᐃᓕᓐᓂᐊᕈᑕᐅᕙᑦᑐᓂᒃ ᖃᓪᓗᓈᑦ ᓄᓇᖓᓂ ᑲᓇᑕᒥ ᐊᒻᒪᓗ ᑐᓐᖓᕕᖃᕐᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ.
  • ᐃᓄᐃᑦ ᕿᑐᕐᖓᓖᑦ ᐊᒻᒪᓗ ᓄᓇᖃᖅᑐᑦ ᑲᒪᖃᑕᐅᓗᑎᒃ ᐋᖅᑭᑦᓯᒪᑦᓯᐊᑐᒃᑯᑦ ᓄᓇᓕᓐᓂ ᐃᓱᒪᓕᐅᕈᑕᐅᔪᓂᒃ ᐃᓕᓐᓂᐊᕐᓯᒪᑦᓯᐊᖅᑐᓄᑦ ᐊᒻᒪᓗ ᐃᑲᔪᕐᓱᖅᑕᐅᑦᓯᐊᕐᓗᑎᒃ DEA ᐊᐅᓚᑦᓯᒍᓐᓇᖁᓪᓗᑎᒃ ᓇᓕᖅᑯᑦᓯᓯᒪᔪᓂᒃ ᐃᓕᓐᓂᐊᕕᓐᓄᑦ ᑲᑎᒪᔨᓂᒃ ᐊᓯᓕᒫᖏᓐᓂ ᑲᓇᑕᒥ.

 

ᒪᒃᑯᑦᑑᒻᒪᑕ ᐃᓄᒋᐊᑦᑎᒋᓂᐅᔪᑦ ᐊᒻᒪᓗ ᐃᓕᓐᓂᐊᖅᑎᖁᑎᕗᑦ ᖁᑦᓯᓂᕐᓴᒥᒃ ᑲᔪᓯᑦᓯᐊᕆᐊᖃᕐᒪᑕ, ᑐᓐᖓᕕᖃᕐᓗᑎᒃ ᐃᓕᖅᑯᓯᑦᑎᓐᓂᒃ ᐊᒻᒪᓗ ᐃᖅᑲᓇᐃᔭᕈᓐᓇᕐᓯᓗᑎᒃ ᐃᓄᒃᑐᑦ. ᐊᑭᓕᐅᑎᒃᓴᕗᑦ ᐃᓕᓐᓂᐊᖅᑎᖁᑎᑦᑎᓐᓄᑦ ᑲᔪᓯᒍᑎᒃᓴᖏᓐᓂᒃ ᐋᖅᑮᓯᒪᖁᓪᓗᑕ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᕌᓂᒃᓯᒪᓂᒃᑯᑦ ᓇᓗᓇᐃᒃᑯᑕᖅᑖᕋᓱᐊᕐᓂᖏᓐᓂ ᓯᕗᒧᐊᒍᓐᓇᖁᓪᓗᒋᑦ ᐃᓕᓐᓂᐊᑲᓐᓂᕕᓐᓄᑦ, ᐱᓕᖕᒪᓴᕐᓂᕐᒧᑦ ᐊᒻᒪᓗ ᐃᖅᑲᓇᐃᔮᒃᓴᓄᑦ ᓄᓇᕗᒻᒥ.

 

ᕿᒪᑦᓯᒪᑐᐃᓐᓇᓐᖏᓚᐅᕐᓚᕗᑦ ᓱᕈᓯᖁᑎᑦᑕ ᐱᔪᓐᓇᐅᑎᖏᑦ ᐱᐅᓂᕐᐹᒥ ᐃᓄᐃᑦ ᐃᓕᓐᓂᐊᖁᓪᓗᒋᑦ.

ᐅᑉᐱᕆᔭᕋ ᑲᑐᔾᔨᓂᒃᑯᑦ ᐋᖅᑭᑦᓱᐃᒍᓐᓇᓂᑦᑎᓐᓂᒃ ᐊᑦᓱᕈᕐᓇᖅᑐᓂᒃ ᑐᕌᒐᖃᕐᓗᑕ ᐱᕚᓪᓕᕈᑎᒃᓴᒥᒃ ᐃᓕᓐᓂᐊᕈᑎᓄᑦ ᐊᐅᓚᑦᓯᒍᑕᐅᔪᒥᒃ ᐃᑲᔫᑎᖃᕐᓗᓂ ᒪᒃᑯᑦᑐᖁᑎᑦᑎᓐᓄᑦ.

ᐃᖅᑲᐅᒪᒋᑦ ᐊᑐᖅᑕᐅᖃᑦᑕᓚᐅᖅᑐᑦ ᐅᔾᔨᓇᖅᑐᑦ ᑲᔪᓯᑎᑕᐅᓯᒪᔪᑦ ᐃᓕᓐᓂᐊᓂᕐᒧᑦ ᓄᓇᕗᒻᒥ, ᐃᓚᒋᔭᐅᓪᓗᑎᒃ: ᐅᓄᕐᓯᒋᐊᒃᑲᓐᓂᕈᑎᒃᓴᓂᒃ ᐃᓄᓐᓂᒃ ᐃᓕᓴᐃᔨᓂᒃ, ᐃᓕᓐᓂᐊᕐᕕᐊᓗᐃᑦ ᐊᑐᐃᓐᓇᐅᑎᑕᐅᓗᑎᒃ ᓄᓇᓕᓕᒫᓂ, ᐃᓕᓐᓂᐊᕈᑎᒃᓴᓕᐅᕐᓗᓂ ᐃᓕᓐᓂᐊᕈᑎᒃᓴᓂᓪᓗ ᐃᓄᐃᑦ ᐅᖃᐅᓯᖓᒍᑦ ᐊᒻᒪᓗ ᐅᓄᖅᓯᑲᓐᓂᕈᑎᒃᓴᖏᓐᓂᒃ ᐃᓕᓐᓂᐊᕆᐊᖃᑦᑕᖅᑐᑦ ᓈᓴᖅᑕᐅᓯᒪᓂᖏᑎᒍᑦ − ᓴᖅᑭᖅᑐᐃᓐᓇᐅᓯᒪᒻᒪᑕ ᐃᓄᐃᑦ ᑐᕋᐃᓐᓇᖅᑐᒥᒃ ᐃᓚᒋᔭᐅᖏᓐᓇᖃᑦᑕᓚᐅᕐᓂᖏᓐᓂᒃ ᐃᓱᒪᓕᐅᕈᑕᐅᒋᐊᓕᓐᓄᑦ ᑲᑎᒪᔩᑦ ᐊᕕᑦᑐᕐᓯᒪᓂᕐᓂ ᐃᓕᓐᓂᐊᖅᑐᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ.

ᑐᓐᖓᕕᒃᑯᑦ, ᐃᓚᖃᖅᑐᑎᒃ ᐱᖓᓱᓂᒃ ᐊᕕᑦᑐᕐᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐊᔭᐅᖅᑐᐃᖏᓐᓇᓂᐊᕐᐳᑦ ᐃᓕᖅᑯᓯᕐᒨᖓᑦᓯᐊᖅᑐᒥᒃ ᐃᓄᒃᑐᑦ−ᐅᖃᐅᓯᕐᒥᒃ ᐃᓕᓐᓂᐊᕈᑎᒥᒃ ᐊᒻᒪᓗ ᐱᓕᕆᐊᖃᕐᓗᑎᒃ ᑐᓐᖓᕕᒋᔭᐅᔪᖅ ᐋᖅᑭᒋᐊᖅᑕᐅᓗᓂ ᐃᑲᔫᑎᖃᖁᓪᓗᒍ ᓱᕈᓯᖁᑎᑦᑎᓐᓄᑦ, ᒪᒃᑯᑦᑐᖁᑎᑦᑎᓐᓄᑦ ᐊᒻᒪᓗ ᐃᓅᖃᑎᑦᑎᓐᓄᑦ.

ᑐᓐᖓᕕᒃᑯᓃᓐᖔᕐᓗᖓ, ᐱᖓᓱᓂᒃ ᐊᕕᑦᑐᕐᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪᓗ ᐃᓄᓐᓂᒃ ᓄᓇᕗᓕᒫᒥ, ᐊᔪᐃᓐᓇᕐᐳᖓ ᑲᑎᒪᔨᕋᓛᖑᑲᐃᓐᓇᖅᑐᑦ ᓴᒃᑯᐃᖁᓪᓗᒋᑦ ᐱᖁᔭᒃᓴᖅ 25-ᒥᒃ.

ᑭᒡᒐᑐᕐᓱᒋᑦ ᓄᓇᕗᒻᒥ ᐃᓄᐃᑦ, ᓴᖅᑭᖅᑕᐅᕙᕋ, ᐋᖅᑭᒋᐊᕐᓯᒪᔪᖅ ᐊᑐᓕᖅᑎᑕᐅᓗᓂᓗᑦ ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᐋᖅᑭᒋᐊᕆᓂᕐᒧᑦ ᐱᖁᔭᖅ.

ᓂᕆᐅᖕᓂᖃᖁᔨᕗᒍᑦ ᒫᒃᑯᒋᐊᕐᓗᑕᓗ, ᐱᔪᒪᓂᖃᕐᓗᑕ ᐃᓕᕋᓱᓐᖏᓪᓗᑕᓗ ᐋᖅᑭᒋᐊᕆᓂᕐᒥᒃ ᑐᓐᖓᕕᒋᔭᐅᔪᖅ ᓈᖕᒪᖏᓐᓂᖓᓄᑦ ᐃᓕᓐᓂᐊᓂᕐᒧᑦ ᐊᐅᓚᑦᓯᔾᔪᑎᑦᑎᓐᓂ, ᓴᐳᔾᔨᓯᒪᒻᒪᑦ ᐅᓄᖅᑐᓂᒃ ᐃᓄᓐᓂᒃ ᒪᒃᑯᑦᑐᖁᑎᑦᑎᓐᓂᒃ ᑲᔪᓯᑦᓯᐊᕈᓐᓇᕋᔭᓚᐅᖅᑑᒐᓗᐊᓂᒃ ᐃᑲᔫᑎᖃᕐᓗᑎᓪᓗ ᒪᑭᒪᔾᔪᑎᒃᓴᖏᓐᓄᑦ ᐱᑕᓕᔾᔪᐊᒻᒪᕆᐊᓘᔪᒥᒃ ᓄᓇᕗᒻᒥ.

ᑕᐃᒪᐃᓕᖓᐃᓐᓇᕐᐳᒍᑦ, ᒪᑐᐃᖓᓪᓗᑕ ᐱᓕᕆᖃᑎᒋᔪᒪᓪᓗᒋᓪᓗ ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᒪᓕᒐᓕᐅᕐᕕᒃ ᓱᖅᑯᐃᒪᔭᐅᓗᓂ ᐃᓕᓐᓂᐊᓂᕐᒧᑦ ᐊᐅᓚᑦᓯᔾᔪᑎ.