ᓇᓗᓇᐃᔭᐃᓂᖅ

 ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᑲᑎᒪᔨᖏᑦ ᑲᑎᓚᐅᕐᒪᑕ ᔪᓚᐃ 26 ᐊᒻᒪ 27, 2018 ᐋᖅᑭᒃᓱᐃᓪᓗᑎᒃ ᐋᖅᑭᒃᓯᒪᔾᔪᑕᐅᓂᐊᖅᑐᓂᒃ ᓯᕗᓪᓕᐅᑎᓯᒪᔭᖏᓐᓄᑦ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐅᑭᐊᒃᓵᖓᓂ 2018 ᑎᑭᓪᓗᒍ ᒫᔾᔨ 2021.  ᑖᓐᓇ ᑎᑎᖅᑲᖅ  ᓴᖅᑭᑎᑦᓯᒍᑕᐅᔪᖅ ᑲᑎᒪᓂᐅᔪᒥᒃ.

ᓄᓇᕗᑦ ᑐᓐᖓᕕᒃ ᑎᒥᖓᑦ ᑲᔪᓯᓯᒪᓂᐊᖅᑐᖅ ᐱᓕᕆᖃᑎᖃᑦᓯᐊᕐᓗᑎᒃ ᐊᒻᒪ ᖃᓄᐃᓕᐅᕈᓘᔭᕐᓗᑎᒃ ᐃᑲᔪᖅᑎᒋᓗᒋᑦ ᒐᕙᒪᑐᖃᒃᑯᑦ ᐊᒻᒪ ᓄᓇᕗᑦ ᒐᕙᒪᖏᑦ ᓯᕗᓪᓕᐅᔾᔭᐅᓯᒪᔪᓂᒃ ᓇᓗᓇᐃᖅᑕᐅᔪᑦ ᑕᒡᕙᓂ ᑎᑎᖅᑲᖁᑕᐅᔪᒥ, ᓈᒪᔪᓂᒃ ᐊᒻᒪ ᐱᓗᐊᓐᖏᑦᑐᓂᒃ ᐊᑐᓕᖅᑎᑕᐅᓗᑎᒃ ᓄᓇᕗᒥ ᐊᖏᕈᑏᑦ ᐊᒻᒪ ᐊᑦᑕᕐᓇᔾᔭᐃᒃᑯᓯᕐᓗᒋᑦ ᐃᓄᐃᑦ ᐱᔪᓐᓇᐅᑎᖏᑦ ᐊᑖᒍᑦ ᓄᓇᕗᒥ ᐊᖏᕈᑏᑦ ᐊᐅᓚᔾᔪᑕᐅᓪᓗᐊᑕᕐᓗᑎᒃ ᐃᓚᒋᓗᓂᒋᑦ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᐅᓚᔾᔪᑎᖏᓐᓄᑦ ᐊᒻᒪ ᐱᓕᕆᐊᖏᓐᓄᑦ.

  1. 2018–2021 ᓯᕗᓪᓕᐅᔾᔭᐅᔪᑦ

ᒪᑯᐊ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐋᖅᑭᒃᓯᒪᔾᔪᑎᒋᓂᐊᖅᑕᖏᑦ ᓯᕗᓪᓕᐅᔭᐅᔪᓄᑦ ᐊᕐᕌᒍᐊᓄᑦ 2018–2021.

  1. ᐱᓕᕆᖃᑎᒋᒐᓱᐊᕐᓂᐊᖅᑕᕗᑦ ᒐᕙᒪᑐᖃᒃᑯᑦ ᐊᒻᒪ ᓄᓇᕗᑦ ᓴᖅᑭᑎᑦᓯᒍᑎᒃᓴᓂᒃ ᐊᒻᒪ ᓯᕗᒻᒧᐊᑦᓯᐊᕈᑎᒃᓴᓂᒃ ᓈᒪᔪᒥᒃ ᐊᑐᓕᖅᑎᑕᐅᔾᔪᑎᒃᓴᖓᓂᒃ ᐋᑎᑯ 23 ᑖᒃᑯᓇᓂ ᓄᓇᕗᒥ ᐊᖏᕈᑎᓂ.

ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᑦ ᐊᒻᒪ ᓈᒪᔪᓂᒃ ᐊᑐᓕᖅᑎᑕᐅᓂᖏᑦ ᑖᑦᓱᒪ ᐋᑎᑯ 23 ᐊᑐᒻᒪᕆᒋᐊᖃᖅᑐᑦ ᐅᖃᐅᓯᖃᕈᑎᒋᓂᐊᕐᓗᒋᑦ ᐊᒥᓱᓂᒃ ᓴᖅᑭᓯᒪᔪᓂᒃ ᐃᓄᐃᑦ ᐃᓅᓯᖏᓐᓂ ᐅᓪᓗᒥ.  ᑲᑎᒪᔩᑦ ᐅᖃᐅᓯᖃᓚᐅᕐᒥᔪᑦ ᐊᓯᔾᔨᖅᑕᐅᒻᒪᕆᒋᐊᖃᕐᓂᖏᓐᓂᒃ ᒐᕙᒪᒃᑯᑦ ᐃᖅᑲᓇᐃᔭᖅᑎᖁᑎᖏᑦ ᐊᒻᒪ ᑕᒪᒃᑯᐊ ᓴᖅᑭᐅᒪᔪᑦ ᒐᕙᒪᓕᕆᓂᒃᑰᕆᐊᖃᕐᓂᖏᑦ.

ᓯᕗᒻᒧᐊᒍᑎᖃᒻᒪᕆᒡᓗᑎᒃ ᐃᓄᑦ ᐃᖅᑲᓇᐃᔭᖅᑎᑕᐅᓂᖏᓐᓂᒃ ᑭᖑᓪᓕᐅᓂᐊᖅᑐᓄᑦ ᐱᖓᓱᓄᑦ ᐊᕐᕌᒍᓄᑦ:

  • ᐋᖅᑭᒃᓱᐃᓗᑎᒃ ᐊᒻᒪ ᐊᑐᓕᖅᑎᑦᓯᓗᑎᒃ ᐋᖅᑭᒃᓱᖅᓯᒪᒻᒪᕆᒃᑐᓂᒃ ᐃᓄᐃᑦ ᐃᖅᑲᓇᐃᔭᖅᑎᐅᓂᖏᓐᓄᑦ ᐸᕐᓇᐅᑎᒃᓴᓂᒃ ᐊᒻᒪ ᐃᖅᑲᓇᐃᔭᕐᓂᐊᓕᓵᕐᓗᓂ ᐃᓕᓐᓂᐊᕐᓂᖅ;
  • ᖃᓄᐃᓕᐅᕆᐊᕈᑎᖃᒻᒪᕆᒡᓗᓂ ᐃᓄᒃᑐᑦ ᐅᖃᐅᓯᖅ ᐱᓕᕆᔾᔪᑕᐅᖁᓪᓗᒍ ᓄᓇᕗᑦ ᒐᕙᒪᖏᓐᓂ:
  • ᐊᑐᓕᖅᑎᑦᓯᓗᓂ ᐃᓄᐃᑦ ᐃᖅᑲᓇᐃᔭᕐᓂᖏᓐᓄᑦ ᐱᖁᔭᕐᓂᒃ: ᐊᒻᒪ
  • ᐋᖅᑭᒋᐊᕐᓗᒋᑦ ᑐᓐᖓᕕᒃᓴᑦ ᐃᓕᓐᓂᐊᖅᑐᓕᕆᓂᕐᒧᑦ ᐊᐅᓚᔾᔪᑕᐅᔪᑦ ᓄᓇᕗᒥ.
  1. ᕿᓂᕐᓂᐊᖅᑐᒍᑦ ᓯᕗᒻᒧᐊᒍᑎᒃᓴᒻᒪᕆᖕᓂᑦ ᓴᓐᖏᒃᑎᑉᐹᓪᓕᕈᑎᒃᓴᖏᓐᓂᒃ ᐃᓄᒃᑐᑦ ᓇᐅᒃᑯᓕᒫᖅ ᐃᓅᓂᕐᒥ ᓄᓇᕗᒥ, ᐃᓚᐅᓗᑎᒃ ᓄᓇᕗᒥ ᐃᓕᓐᓂᐊᖅᑐᓕᕆᓂᕐᒧᑦ ᐊᐅᓚᔾᔪᑕᐅᔪᑦ, ᑕᖅᑲᒃᑯᓄᖓ ᐱᔨᑦᓯᕋᕐᕖᑦ ᐃᖅᑲᓇᐃᔭᕐᕖᑦ ᐊᒻᒪ ᓴᖅᑭᐅᒪᑎᑕᐅᒋᐊᓖᑦ ᒐᕙᒪᒃᑯᑦ ᐱᓕᕆᐊᖏᑦ ᐊᒻᒪ ᐱᔨᑦᓯᕋᐅᑎᖏᑦ.

ᐃᓄᐃᑦ ᐱᕈᖅᑎᑦᓯᒃᑲᓐᓂᕋᓱᐊᕐᒪᑕ ᐅᐱᒍᓱᖕᓂᕐᒥᓂᒃ ᐃᓅᓂᕐᒥᓄᑦ ᑕᒪᓐᓇ ᓱᕋᒃᑎᖅᑕᐅᓯᒪᖕᒪᑕ ᖃᓪᓗᓈᑑᓕᖅᑎᑦᓯᒐᓱᐊᓚᐅᕐᓂᖏᑦ ᑎᑭᕋᓚᐅᖅᑐᑦ ᐊᒻᒪ ᑭᖑᓂᑦᑎᓐᓂ ᒐᕙᒪᒃᑯᑦ ᐊᑐᐊᒐᖏᓐᓄᑦ ᑲᑎᑎᑦᓯᕙᓪᓕᐊᓪᓗᑎᒃ.

ᐃᓄᒃᑐᑦ ᐱᑕᖃᕆᐊᖃᕐᒪᑦ ᐊᒻᒪ ᐃᓚᒋᒻᒪᕆᒃᑐᓂᐅᒃ ᐃᓄᐃᑦ ᑭᓇᐅᓂᖏᓐᓂᒃ.  ᐃᓄᐃᑦ ᐃᓕᖅᑯᓯᖏᑦ, ᓇᑭᓐᖔᕐᓂᖏᑦ, ᐱᖅᑯᓯᑐᖃᖏᑦ ᐊᒻᒪ ᐅᒃᐱᕆᔭᖏᑦ ᐃᓕᓯᒪᒻᒪᕆᖕᒪᑕ ᐊᒻᒪ ᐊᑐᖅᑕᐅᕙᒃᑐᑎᒃ ᐅᖃᐅᓯᑦᑎᒍᑦ.

ᑎᑎᕋᖅᑕᐅᓯᒪᑦᓯᐊᖅᑐᑦ ᑕᒪᓐᓇ ᐃᓄᒃᑐᑦ ᐊᑐᖅᑕᐅᓂᖓ ᐅᓄᕈᓐᓃᖅᐸᓪᓕᐊᖕᒪᑦ.  ᑐᐊᕕᕐᓇᖅᑑᓕᕐᒪᑦ ᐊᒻᒪ ᐱᒻᒪᕆᐅᔪᓂᒃ ᖃᓄᐃᓕᐅᕈᑎᖃᕆᐊᖃᓕᕐᒪᑕ ᑕᒪᓐᓇ ᑭᐳᖔᖁᓪᓗᒍ.

ᑕᐃᒪᐃᒻᒪᑦ, ᐱᑕᖃᕆᐊᖃᖅᐳᖅ ᐃᓘᓐᓇᖏᑎᒍᑦ ᐊᑐᕐᓗᑎᒃ, ᑐᐊᕕᕐᓇᕐᑑᑎᓪᓗᒍ ᐊᒻᒪ ᐃᓱᒫᓘᑕᐅᔪᑦ ᖃᓄᐃᓕᐅᕈᑕᐅᒋᐊᖃᕐᓂᖏᑦ, ᑕᒪᓐᓇ ᖁᒡᕙᕆᐊᒻᒪᕆᖁᓪᓗᒋᑦ ᐃᒪᐃᓕᐅᖁᔨᓂᖅ:

  • ᐃᓄᒃᑐᑦ ᐅᖃᓯᐅᒻᒪᕆᖁᓪᓗᒍ ᐃᓕᓐᓂᐊᖅᑎᑦᓯᔾᔪᑕᐅᓗᓂ ᓄᓇᕗᒥ;
  • ᐃᓄᒃᑐᑦ ᐃᓕᑕᕆᔭᐅᓯᒪᖁᓪᓗᒍ ᐅᖃᐅᓯᖅ ᑲᓇᑕᒥ ᑕᒫᓂᓄᓇᕗᒥ;
  • ᐃᓄᒃᑐᑦ ᐅᖃᐅᓯᕆᔭᐅᒻᒪᕆᖕᓂᐊᕐᓗᓂ ᐱᓕᕆᔾᔪᑎᒋᓗᒍ ᒐᕙᒪᒃᑯᑦ ᐊᓪᓚᒡᕕᖏᓐᓂ: ᐊᒻᒪ
  • ᐃᓄᒃᑐᑦ ᐅᖃᐅᓯᐅᒻᒪᕆᓂᐊᕐᓗᓂ ᓴᖅᑭᐅᒪᑎᑕᐅᓂᖏᓐᓄᑦ ᐱᑕᖃᕆᐊᓖᑦᑦ ᒐᕙᒪᒃᑯᑦ ᐱᓕᕆᐊᖏᓐᓂ ᐊᒻᒪ ᐱᔨᑦᓯᕋᐅᑎᖏᓐᓂ ᐃᓚᐅᓗᑎᒃ ᐋᓐᓂᐊᖅᑐᓕᕆᓂᖅ, ᐃᓕᓐᓂᐊᖅᑐᓕᕆᓂᖅ ᐊᒻᒪ ᐃᖅᑲᖅᑐᐃᕕᓕᕆᓂᒃᑯᑦ ᓄᓇᕗᒥ:
  1. ᐱᓕᕆᖃᑎᒋᒐᓱᐊᕐᓂᐊᖅᑕᕗᑦ ᒐᕙᒪᑐᖃᒃᑯᑦ ᐊᒻᒪ ᓄᓇᕗᑦ ᓴᖅᑭᑎᑦᓯᒐᓱᐊᕐᓗᑕ ᐃᓕᓐᓂᐊᖅᑐᓕᕆᓂᐅᑉ ᐊᐅᓚᔾᔪᑎᖏᑦ ᒪᓕᖁᓪᓗᒋᑦ ᐊᒻᒪ ᓴᖅᑭᔮᖅᑎᑦᓯᖁᓪᓗᒋᑦ ᐃᓄᐃᑦ ᓯᕗᓪᓕᐅᑎᓯᒪᔭᖏᓐᓂᒃ ᐊᒻᒪ ᐃᓄᐃᑦ ᐃᓕᖅᑯᓯᖏᓐᓂᒃ.

ᐃᓕᓐᓂᐊᕐᕕᖕᒦᑎᒋᐊᕐᓂᐊᕈᑦᑎᒍ ᓄᑕᖅᑲᕗᑦ ᐱᑕᖃᕆᐊᖃᕐᓂᐊᖅᑐᖅ ᐋᖅᑭᒃᓱᐃᓗᑎᒃ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᑦᓯᒍᑎᒃᓂᒃ ᐃᓗᓕᖃᒻᒪᕆᒃᑐᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪ ᑎᓕᐅᕐᓗᒋᑦ ᐊᒻᒪ ᐃᑲᔪᖅᓱᕐᓗᒋᑦ ᐃᓄᐃᑦ ᓄᑕᕋᖏᑦ ᐊᒻᒪ ᒪᒃᑯᒃᑐᑦ ᑲᔪᓯᖁᓪᓗᒋᑦ ᐊᒻᒪ ᓯᕗᒻᒧᐊᑦᓯᐊᖁᓪᓗᒋᑦ ᓇᐅᒃᑯᓕᒫᖅ ᐃᓕᓐᓂᐊᖅᑐᓕᕆᓂᒃᑯᑦ.

ᑖᑦᓱᒪ ᐃᓱᐊᓅᕋᓱᐊᕐᓗᑕ, ᐃᒪᐃᒐᓱᐊᕐᓂᐊᖅᑐᒍ:

  • ᐱᓕᕆᖃᑎᒋᓗᒋᑦ ᓄᓇᕗᑦ ᒐᕙᒪᖏᑦ ᐱᓪᓗᒋᑦ ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᐃᑦ ᕿᒥᕐᕈᐊᖅᑕᐅᓗᑎᒃ, ᐱᒻᒪᕆᐅᔪᓂᒃ ᐋᖅᑭᒋᐊᖅᑕᐅᔾᔪᑎᒃᓴᓂᒃ ᐃᓕᓐᓂᐊᖅᑐᓕᕆᓂᕐᒧᑦ ᐊᐅᓚᔾᔪᑕᐅᔪᓂᒃ ᓄᓇᕗᒥ ᒪᓕᒃᑐᓂᒃ ᐃᓄᐃᑦ ᓯᕗᓪᓕᐅᑎᓯᒪᔭᖏᓐᓂᒃ (ᓲᕐᓗ, ᖃᐅᔨᔾᔪᑎᒃᓴᖅᑕᖃᕐᓗᓂ ᓯᕗᒻᒧᐊᒃᐸᓪᓕᐊᓂᐅᔪᓂᒃ ᐃᓄᒃᑐᑦ ᐊᑐᖅᑕᐅᒻᒪᕆᒍᑎᒃᓴᖏᑦ ᐅᖃᐅᓯᕐᓄᑦ ᐃᓕᓐᓂᐊᖅᑎᑦᓯᔾᔪᑏᑦ ᓄᓇᕗᑦ ᐃᓕᓐᓂᐊᕐᕕᖏᓐᓂ);
  • ᐱᓕᕆᖃᑎᒋᓗᒋᑦ ᒐᕙᒪᑐᖃᒃᑯᑦ ᐊᒻᒪ ᐊᕕᒃᑐᑦᓯᒪᓂᐅᔪᒥ ᒐᕙᒪᐅᔪᑦ ᑮᓇᐅᔭᐃᕈᑎᖃᒻᒪᕆᖕᓂᐊᕐᓗᓂ ᓄᑖᓄᑦ ᐃᓕᓐᓂᐊᕈᑎᒃᓴᓄᑦ ᐃᓄᒃᑐᑦ−ᐅᖃᕈᓐᓇᖅᑐᓄᑦ ᐃᓕᓴᐃᔨᓄᑦ; ᐊᒻᒪ
  • ᐱᓕᕆᖃᑎᒋᓗᒋᑦ ᒐᕙᒪᑐᖃᒃᑯᑦ ᐊᒻᒪ ᐊᕕᒃᑐᑦᓯᒪᓂᐅᔪᒥ ᒐᕙᒪᐅᔪᑦ ᖃᓄᐃᓕᐅᕆᐊᕈᑎᒋᓂᐊᖅᑕᖏᓐᓂᒃ ᓴᓐᖏᑦᑎᑉᐹᓪᓕᖁᓪᓗᒋᑦ ᐃᓄᒃᑐᑦ ᐸᐃᕆᕕᐅᔪᓂ ᓄᓇᕗᒥ.
  1. ᐱᓕᕆᖃᑎᖃᕋᓱᐊᕐᓂᐊᖅᑐᒍᑦ ᒐᕙᒪᑐᖃᒃᑯᓐᓂᒃ ᐊᒻᒪ ᓄᓇᕗᒥᑦ ᓯᕗᒻᒧᐊᑦᓯᐊᖁᓪᓗᒋᑦ ᑐᐊᒡᓕᑎᕋᓱᐊᕐᓗᒍ ᐃᒡᓗᓕᕆᓂᖅ ᐊᒻᒪ ᐊᓯᖏᑦ ᐱᖁᑎᕐᔪᐊᖑᒋᐊᓖᑦ ᑭᓐᖒᒪᒋᔭᐅᔪᑦ ᓄᓇᕗᒥ ᐊᒻᒪ ᖁᒡᕙᕆᐊᖅᑎᓪᓗᒋᑦ ᐱᖁᑎᕐᔪᐊᓕᕆᓂᕐᒧᑦ ᐊᑐᖅᑕᐅᒋᐊᓖᑦ ᓄᓇᕗᒥ ᒪᓕᓕᖁᓪᓗᒋᑦ ᑲᓇᑕᐅᑉ ᐊᑐᖅᐸᒃᑕᖏᑦᑕ ᓇᓕᒧᖏᓐᓂ.

ᑐᐊᕕᕐᓇᖅᑑᓕᕐᒪᑦ ᐋᖅᑭᒃᓯᒋᐊᖃᕐᓂᖅ ᑐᓐᖓᕕᒃᓴᓂᒃ ᐱᖁᑎᕐᔪᐊᖑᒋᐊᖃᖅᑐᓄᑦ ᓄᓇᕗᒥ ᐃᓚᐅᑎᑦᓯᔪᓂᒃ ᑭᓯᐊᓂ ᐃᓱᒋᓐᖏᓪᓗᒋᑦ ᒪᑯᐊ:

  • ᐊᖅᑯᑏᑦ, ᑐᓚᒃᑕᕐᕖᓪᓗ
  • ᐃᒡᓗᓕᕆᓂᖅ
  • ᐃᓐᓇᒃᑯᕖᑦ
  • ᐆᒪᔪᓕᕆᓂᕐᒧᑦ ᖃᐅᔨᓴᕐᓂᖅ/ᖃᐅᔨᓴᖅᑕᐅᕕᒃ ᐃᒡᓗ
  • ᐱᖅᑯᓯᑐᖃᓕᕆᕝᕕᒃ/ᐃᓕᖅᑯᓯᓕᕆᕝᕖᑦ ᐃᒡᓗᐃᑦ
  • ᐃᓚᒋᐊᕐᓗᒋᑦ/ᒪᒥᓴᕐᕖᑦ ᐃᒡᓗᐃᑦ
  • ᒪᒃᑯᒃᑐᖃᕐᕕᒃᓴᑦ ᐃᒡᓗᐃᑦ
  • ᐆᒻᒪᖅᑯᑎᓕᕆᕝᕖᑦ ᐃᒡᓗᐃᑦ
  • ᐃᒐᓚᐅᔭᐃᑦ ᖃᕆᓴᐅᔭᖃᕈᑏᑦ ᐊᒻᒪ ᓱᑲᔪᒥᒃ ᐃᑭᐊᖅᑭᕕᖕᓅᕈᑏᑦ

ᐱᑕᖃᕆᐊᓕᖕᓂᑦ ᐱᖁᑎᕐᔪᐊᓂᒃ ᐱᑕᖃᓐᖏᓗᐊᕐᓂᖓ ᐊᒃᑐᐃᓯᒪᓂᕐᓗᒃᓯᒪᒻᒪᕆᒃᑐᖅ ᓄᓇᕗᒥᐅᑦ ᓇᖕᒥᓂᖅ ᒪᑭᒪᒍᓐᓇᕐᓂᖏᓐᓄᑦ, ᐱᐅᓯᕚᓪᓕᕈᑎᒃᓴᑦ ᐃᓅᖏᓐᓄᑦ ᐊᒻᒪ ᖃᓄᐃᓐᓂᖏᓐᓄᑦ ᐃᓅᒐᓱᐊᕐᓂᖏᑦ, ᓄᖅᑲᖅᑎᑦᓯᒐᓱᐊᕈᑎᒃᓴᑦ ᓂᕿᑭᒃᓴᕐᓂᕐᒧᑦ ᐊᒻᒪ ᓂᕿᖃᑦᓯᐊᕆᐊᖃᓂᕐᒧᑦ ᐊᒻᒪ ᐊᑭᑦᑐᕋᐅᑎᖃᑎᖃᕐᓂᖅ ᐅᓪᓗᒥ ᑮᓇᐅᔭᓕᐅᕈᑎᖃᕋᓱᐊᕐᓗᓂ.

ᐱᖓᓲᓂᐊᖅᑐᓂ ᐊᕐᕌᒍᓂ ᐃᒪᐃᓐᓂᐊᖅᑐᒍᑦ:

  • ᐱᓕᕆᖃᑎᒋᓗᒋᑦ ᒐᕙᒪᐅᔪᑦ ᐋᖅᑭᒃᓱᐃᓗᓂ ᐃᓄᐃᑦ ᓄᓇᕗᒥ ᐃᒡᓗᖃᖅᑎᑕᐅᓂᖏᓐᓄᑦ ᐸᕐᓇᐅᑎᓂᒃ, ᐃᓚᓕᐅᑎᓗᒋᑦ ᑲᓇᑕᒥ ᐃᒡᓗᖃᖅᑎᑦᓯᓂᕐᒧᑦ ᐸᕐᓇᐅᑎᓂᒃ ᐊᒻᒪ ᓄᓇᕗᑦ ᒐᕙᒪᖏᑦᑕ ᑎᑎᕋᐅᔭᖅᓯᒪᔪᑦ ᐱᓕᕆᔾᔪᑎᒃᓴᖏᑦ ᐃᒡᓗᓕᕆᓂᕐᒧᑦ;
  • ᐱᓕᕆᖃᑎᒋᓗᒋᑦ ᒐᕙᒪᐅᔪᑦ ᐋᖅᑭᒃᓱᐃᓗᓂ ᓯᕕᑐᔪᒧᑦ ᐱᖁᑎᕐᔪᐊᓕᕆᓂᕐᒧᑦ ᐸᕐᓇᑎᓂᒃ ᐊᒻᒪ ᐱᒋᐊᓵᕐᓗᒋᑦ ᐊᑐᓕᖅᑎᑦᓯᕙᓪᓕᐊᓂᖅ ᑕᒪᒃᑯᓂᖓ ᐸᕐᓇᐅᑕᐅᔪᓂᒃ ᐊᒻᒪ ᐱᕙᓪᓕᐊᑎᑕᐅᓂᖏᑦ ᐸᕐᓇᐅᑏᑦ ᐱᓕᕆᐊᒃᓴᑦ: ᐊᒻᒪ
  • ᐱᓕᕆᖃᑎᒋᓗᒋᑦ ᒐᕙᒪᐅᔪᑦ ᐊᒻᒪ ᓇᖕᒥᓂᖃᖅᑐᑦ ᐋᖅᑭᒃᓯᓂᐊᕐᓗᓂ ᐸᕐᓇᐅᑎᓂᒃ ᐱᕙᓪᓕᐊᑎᑦᓯᓂᕐᒧᑦ ᑮᓇᐅᔭᓂᒃ ᐊᖏᔫᑎᓄᑦ ᐱᖁᑎᕐᔪᐊᓄᑦ ᐱᓕᕆᐊᒃᓴᑦ ᓄᓇᕗᒥ.
  1. ᐱᓕᕆᖃᑎᒋᓂᐊᖅᑕᕗᑦ ᒐᕙᒪᑐᖃᒃᑯᑦ ᐊᒻᒪ ᓄᓇᕗᑦ ᓴᖅᑭᑎᓪᓗᒋᑦ ᐋᑎᑯ 32 ᖃᐃᕈᑏᑦ ᓴᖅᑭᔮᖅᑎᑦᓯᔾᔪᑎᒋᓂᐊᕐᓗᒋᑦ ᑐᑭᖃᖅᑐᓂᒃ ᐃᓄᐃᑦ ᐃᓚᐅᑎᑕᐅᓗᑎᒃ ᐱᕙᓪᓕᐊᑎᑕᐅᓂᖏᓐᓂᒃ ᐃᓅᓯᕐᓅᖓᔪᑦ ᐊᒻᒪ ᐃᓕᖅᑯᓯᓕᕆᓂᕐᒧᑦ ᐊᑐᐊᒐᕐᓄᑦ ᐊᒻᒪ ᐱᓕᕆᐊᓄᑦ ᓄᓇᕗᒥ.

ᒐᕙᒪᒃᑯᑦ ᐊᑐᐊᒐᖏᑦ, ᐱᓕᕆᐊᖏᓪᓗ ᒪᓕᒋᐊᖃᖅᑐᑦ ᐊᒻᒪ ᓴᖅᑭᔮᖅᑎᑦᓯᓗᑎᑎᒃ ᐃᓄᐃᑦ ᐃᓅᓯᕐᒧᑦ ᐅᒃᐱᕆᔭᖏᓐᓂᒃ, ᐃᓕᖅᑯᓯᖏᓐᓂᒃ, ᐱᖅᑯᓯᑐᖃᖏᓐᓂᒃ.  ᐊᑑᑎᖃᖅᑐᒥᒃ ᐃᓄᐃᑦ ᐃᓚᐅᑎᑕᐅᓗᑎᒃ ᑕᒪᑐᒧᖓ ᐱᒻᒪᕆᐅᔪᑦ ᐅᖃᐅᓯᖃᕈᑎᒋᓂᐊᕐᓗᒋᑦ ᑭᖑᓂᑦᑎᓐᓂ ᐋᓐᓂᕈᑕᐅᓯᒪᔪᑦ ᐊᒻᒪ ᖃᖔᓗᓂᒃ ᐱᓂᕐᓘᑕᐅᓯᒪᔪᑦ ᐃᓄᐃᑦ ᐃᓅᓯᖏᓐᓄᑦ ᐊᒻᒪ ᓴᖅᑭᑎᑦᓯᓗᑎᒃ ᐊᖏᓂᖅᓴᓂᒃ ᑐᕌᒐᒃᓴᓂᒃ ᓴᐃᒻᒪᖃᑎᒌᖕᓂᕐᒧᑦ.

 

https://www.tunngavik.com/wp-content/blogs.dir/1/files/2019/09/Niriuttaarijat-NTI-Board-Priorities-2018-2021%E1%90%83%E1%93%84%E1%92%83%E1%91%90%E1%91%A6.pdf