ᒪᓕᒃᑐᒋᑦ ᐊᒻᒪ ᐅᕙᓐᓄᑦ ᑐᓴᕐᑎᑕᐅᒍᑎᐅᓯᒪᔪᑦ ᐃᓄᖕᓂᑦ ᓄᓇᕗᖕᒥ, ᐊᒃᓱᕈᕈᑎᖃᐃᓐᓇᕐᐳᖓ ᐅᑯᓂᖓ:

ᐃᓄᐃᑦ ᐅᖃᐅᓯᖏᓐᓂᒃ, ᐃᓕᖅᑯᓯᖏᓐᓂᒃ ᐊᒻᒪ ᑭᓇᐅᓂᑦᑎᓐᓂ

ᐃᓅᓯᕆᔭᕗᑦ ᐊᓯᔾᔨᐸᓪᓕᐊᖕᒪᑦ ᐊᔾᔨᒋᔪᓐᓃᕐᑐᓂᐅᓪᓗ ᐊᖓᔪᖅᑳᑦᑕ ᐊᒻᒪ ᐊᓈᓇᑦᓯᐊᑦᑕ, ᐊᑖᑕᑦᓯᐊᑦᑕ ᐃᓅᓯᕆᕙᓚᐅᕐᑕᖏᓐᓂᒃ. ᐃᓱᒪᒋᔭᒃᑯᓪᓕ ᐱᒻᒪᕆᐅᓇᓱᒋᒐᒃᑯ ᐃᑲᔪᕐᓯᕐᓗᑎᒍ ᐊᒻᒪ ᖃᐅᔨᒪᒐᑦᑕ ᐃᓅᓯᖃᑦᑎᐊᕈᓐᓇᕐᑐᒍᑦ ᐅᓪᓗᒥᐅᔪᖅ ᓄᓇᕐᔪᐊᕐᒥ ᐃᓅᓯᐅᓕᕐᑐᑦ ᑖᒃᑯᐊᖑᒐᓗᐊᕐᑎᓪᓗᒋᑦ ᑐᙵᕕᖃᑦᑎᐊᕈᓐᓇᕋᑦᑕᓱᓕ ᐃᓄᐃᑦ ᐃᓕᖅᑯᓯᖏᓐᓂᒃ.

ᐃᓄᐃᑦ ᒪᑭᑉᐸᓪᓕᔾᔪᑎᒋᔪᓐᓇᕐᑕᒥᓂᒃ ᐱᓕᕆᒻᒪᑕ ᐊᒻᒪ ᐅᐱᒋᔭᖃᖅᑐᑎᒃ ᐃᓅᓂᕐᒥᓂᒃ ᐅᓚᕕᑕᐅᓚᐅᕐᓯᒪᒐᓗᐊᕐᑎᓪᓗᒋᑦ ᓯᕗᓂᑦᑎᓐᓂ ᖃᓪᓗᓈᑦ ᐊᐅᓚᑦᑎᓂᖏᓐᓄᑦ ᐊᒻᒪ ᓯᕗᓪᓖᑦ ᒐᒪᒋᔭᐅᖃᑦᑕᕐᓯᒪᔪᑦ ᐱᓕᕆᔾᔪᑎᖏᑦᑎᒍᑦ ᓲᕐᓗ ᒪᑯᐊ ᐊᐅᓪᓚᕐᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᑦ.

ᑐᐊᕕᕐᓇᓯᒻᒪᑦ ᐊᒻᒪ ᐊᒃᓱᕉᑕᐅᔭᕆᐊᖃᕐᒪᑕ ᐳᐃᒍᖅᑕᐅᖁᓇᒋᑦ ᐃᓄᒃᑐᑦ ᐅᖃᓪᓚᒍᓐᓇᕐᓂᖅ ᐊᒻᒪᓗ ᐃᓄᐃᑦ ᐱᖅᑯᓯᖏᓐᓂᒃ, ᐅᖃᐅᓯᖏᓐᓂ ᐊᒻᒪᓗ ᐃᓕᖅᑯᓯᖏᓐᓂᒃ.

ᐱᒻᒪᕿᐅᑎᓐᓇᓱᐊᕐᐸᒃᑲ ᐅᑯᐊ ᖁᓚᕐᓇᐃᕐᑐᒥᒃ ᓄᓇᕗᖕᒥ ᐃᓄᐃᑦ ᐊᑐᐃᓐᓇᖃᕈᓐᓇᖁᓪᓗᒋᑦ ᐱᓕᕆᔾᔪᑎᓂᒃ, ᑲᒪᒋᔭᐅᒋᐊᙵᖅᑐᓂᒃ ᐊᒻᒪᓗ ᐃᑲᔪᕐᓯᒍᑎᓂᒃ ᑐᑭᓯᐊᓂᖃᓕᕈᒪᒍᑕᐅᒍᓐᓇᕐᑐᓂᒃ, ᐊᑑᑎᖃᕐᓗᑎᓪᓗ ᐊᒻᒪ ᐅᖃᕆᐅᖅᓴᑎᑦᑎᓂᕐᒥᒃ ᐃᓄᐃᑦ ᐅᖃᐅᓯᖏᓐᓂᒃ, ᐃᓕᖅᑯᓯᖏᓐᓂᒃ ᐊᒻᒪᓗ ᑭᓇᐅᓂᖏᓐᓂᒃ.

ᑕᒪᓐᓇ ᐱᖃᓯᐅᔾᔨᕗᖅ ᐊᒃᓱᕈᕈᑎᖃᓐᓂᕐᒥᒃ ᐊᑑᑎᖃᖅᑎᑕᐅᓕᕐᓂᕐᓴᐅᖁᓪᓗᒍ ᐃᓄᒃᑐᑦ ᑕᒪᐃᓐᓂ ᐃᓅᓯᑦᑎᓐᓄᑦ ᐊᑕᔪᓄᑦ ᓄᓇᕗᖕᒥ, ᐱᖃᑕᐅᓪᓗᓂ ᓄᓇᕗᖕᒥ ᐃᓕᓐᓂᐊᕐᓂᓕᕆᔾᔪᓰᑦ, ᐃᓄᓕᒫᓄᑦ ᐱᔨᑦᑎᕈᑎᑦ ᐃᖅᑲᓇᐃᔭᕐᕕᓂ, ᐊᒻᒪᓗ ᒐᕙᒪᒃᑯᑦ ᐱᓕᕆᐊᒃᓴᖏᑦᑎᒍᑦ ᐊᒻᒪ ᐱᔨᑦᑎᕈᑎᖏᑦᑎᒍᑦ.

ᐃᓕᓐᓂᐊᕐᓂᓕᕆᓂᖅ

ᑭᒃᑯᓕᒫᑦ ᐃᓕᒍᓐᓇᕐᒪᑕ ᐊᔾᔨᒌᙱᑦᑐᑦ ᐃᓕᓴᒍᓰᑦ ᐊᑐᖅᑐᒋᑦ. ᐃᓱᒪᒋᓪᓗᒍ ᐱᒻᒪᕆᐅᖕᒪᑦ ᐱᐅᔫᔭᕆᐊᖃᓐᓂᖏᑦ ᐃᓕᓐᓂᐊᕈᑕᐅᔪᑦ ᐃᓄᖕᒧᑦ ᐊᒻᒪᓗ ᐊᒥᓱᑦ ᐃᓅᓯᖃᑦᑎᐊᖁᓪᓗᒋᑦ ᐃᓐᓇᐅᓕᕈᑎᒃ, ᐊᒃᓱᕉᑎᒋᖃᓯᐅᑎᕙᕋ ᐊᑐᐃᓐᓇᖃᕆᐊᖃᓐᓂᖅ ᐃᓕᓐᓂᐊᕐᕕᓂ ᐃᓕᓐᓂᐊᕈᑎᑦᑎᐊᕙᓐᓂᒃ ᐃᑲᔪᕐᓂᖃᕈᓐᓇᕐᑐᓂᒃ ᐃᓅᓱᒃᑐᓄ ᖃᐅᔨᒪᓂᕐᑖᕈᓐᓇᖁᓪᓗᒋᑦ, ᐃᓕᖅᑯᓯᖃᓕᕐᐸᓪᓕᐊᖁᓪᓗᒋᑦ ᐃᓅᓯᖃᑦᑎᐊᓂᕐᒥᒃ ᐊᒻᒪᓗ ᐱᔭᕇᔭᕐᓯᒪᔪᓐᓇᖁᓪᓗᒋᑦ ᐃᓅᓯᓕᒫᕐᒥᓄᑦ.

ᐃᓄᒃᑐᑦ ᐅᖃᓪᓚᒍᓐᓇᕐᓂᖅ ᓱᒃᑲᐃᑦᑐᑦᒥᒃ ᐳᐃᒍᖅᑕᐅᕙᓪᓕᐊᒻᒪ ᐅᑭᐅᓂ ᖄᖏᕋᑖᕐᑐᓂ. ᐱᖃᑕᐅᓗᑎᒃ ᓄᓇᓖᑦ, ᐊᖏᔪᖅᑳᕆᔭᑦ ᐊᒻᒪᓗ ᐃᓚᔮᕇᑦ, ᓄᓇᕗᖕᒥ ᐃᓕᓐᓂᐊᕐᕕᓂ ᐃᓕᓴᐃᒍᓰᑦ ᐱᒻᒪᕆᐅᔪᒥᒃ ᐃᓕᓴᑎᑦᑎᒋᐊᖃᑉᕐᒪᑕ ᐃᓄᒃᑐᑦ ᐅᖃᐅᓯᕐᓂᒃ. ᑕᐃᒪᐃᓐᓂᖓᓄᑦ, ᐃᒪᓐᓇᐃᑦᑕᕆᐊᖃᖅᐳᒍᑦ ᑐᐊᕕᕐᓇᕆᓗᒍ ᐊᒻᒪ ᐊᐅᓚᑦᑎᖃᑎᒌᓐᓂᒃᑯᑦ ᖃᓄᖅᑑᐸᓪᓕᐊᔭᕆᐊᖃᕈᑎᒋᕙᕗᑦ ᐃᓄᒃᑐᑦ ᐅᖃᐅᓯᖅ ᓯᕗᓪᓕᐅᓗᓂ ᐃᓕᓴᐃᒍᑕᐅᔭᕆᐊᖃᓐᓂᖓ ᓄᓇᕗᑦ ᐃᓕᓐᓂᐊᕐᕕᖏᓐᓂ.

ᓇᓗᖅᑯᑎᙱᓂᕐᓴᐅᓕᕐᓂᕗᑦ ᐊᒻᒪᓗ ᐊᑕᐅᑦᑎᒃᑯᑦ ᐃᓱᐊᕐᓴᕐᓂᖅ

ᐅᖃᐅᓯᕆᓗᐊᕐᐸᙱᓐᓇᑦᑎᒍᑦ ᓱᓇᑐᐃᓐᓇᐃᑦ ᐊᓯᔾᔨᕐᓯᒪᔪᑦ ᐅᕙᑦᑎᓐᓂᒃ ᓈᖕᒪᖏᑦᑐᓂᒃ ᐊᑦᑐᐃᓯᒪᒐᓗᐊᕐᑎᓪᓗᒋᑦ ᐃᓅᖃᑎᒌᑎᒍᑦ. ᑕᑯᕙᑦᑕᕗᓪᓘᓐᓃᑦ ᓇᓗᓇᙱᒍᑎᒋᔭᖏᑦ ᑕᒪᐃᓐᓂ ᓄᓇᓕᖕᓂ ᐅᓄᕐᑑᑎᓪᓗᒋᑦ ᓂᖓᕐᓂᐅᕙᒃᑐᑦ, ᐅᓄᕐᑑᑎᓪᓗᒋᑦ ᐊᖓᔮᕐᓇᕐᑐᓂᒃ ᐊᑐᕐᓂᓗᒃᑐᑦ, ᐅᓄᕐᑐᓪᓗ ᐱᔮᕆᓪᓗᑎᒃ ᑐᖁᓴᖅᑐᑦ.

ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐱᓕᕆᖃᑎᕗᑦ ᐃᖅᑲᓇᐃᔭᕐᒪᑕ ᖁᓚᓐᓇᖏᑦᑐᒃᑯᑦ ᐃᑲᔪᕐᑎᖃᖁᓪᓗᒋᑦ ᓄᓇᕗᖕᒥᐅᑦ ᐃᓄᐃᑦ ᑲᒪᒋᔭᐅᒋᐊᕈᓐᓇᖁᓪᓗᒋᑦ ᐃᒻᒥᒃᑯᑦ ᐊᒻᒪᓗ ᐃᓄᒋᐊᖑᓗᑎᒃ ᐊᒃᓲᕈᓴᓐᓂᑯᑦ ᐃᓱᐊᕐᓴᐸᓪᓕᐊᔪᓐᓇᖁᓪᓗᒋᑦ.

ᑎᓕᐅᕐᐸᒃᑲ ᑕᒪᐃᑕ ᓄᓇᕗᖕᒥᐅᑦ ᐃᓱᒪᕐᓱᕐᓗᑎᒃ ᓱᓇᑐᐃᓐᓇᕐᒥ ᐱᔪᒪᓪᓚᕆᒃᑕᒥᓂᒃ ᐱᓇᓱᐊᖁᓪᓗᒋᑦ, ᑯᒃᓴᓇᖅᑑᔮᕋᓗᐊᕐᐸᑕ ᐱᓇᓱᐊᕐᓗᒋᑦ − ᓯᓚᑦᑐᓴᕐᕕᖕᒥ ᐃᓕᓐᓂᐊᕐᓂᐊᕈᑎᒃ ᐅᕝᕙᓗ ᐱᖅᑯᓯᑐᖃᒃᑯᑦ ᐃᓅᓇᓱᐊᕈᑕᐅᔪᓂᒃ.

ᓱᓇᑐᐃᓐᓇᐃᑦ ᐱᕚᓪᓕᕆᐊᖃᕋᓗᐊᕐᑎᓪᓗᖏᑦ, ᖃᐅᔨᒪᔭᕆᐊᖃᓪᓚᕆᒃᐳᒍᑦ ᐊᒻᒪ ᐊᑑᑎᖃᖅᑎᓪᓗᒋᑦ ᐃᑲᔪᕐᑎᐅᕙᒃᑐᑦ ᐊᑐᐃᓐᓇᐅᔪᑦ ᓄᓇᑦᑎᓐᓂ ᐃᓕᓐᓂᐊᕐᓯᒪᙱᑦᑑᒐᓗᐊᑦ ᐊᒻᒪ ᐃᓕᓐᓂᐊᕐᓯᒪᓂᖃᖅᑐᑦ. ᑭᓯᐊᓂ ᑐᑭᓯᓯᒪᓗᑕ ᐊᒻᒪ ᑲᒪᒋᒋᐊᕈᑦᑎᒍᑦ ᓯᕗᓕᑕ ᐊᑐᕐᓯᒪᔭᖏᑦ, ᐱᔾᔪᑎᒋᔭᕗᓪᓗ, ᐊᒻᒪᓗ ᐱᔭᕐᓂᙱᑦᑑᒐᓗᐊᑦ ᐱᕕᖃᕐᕕᓴᐅᑎᖔᓕᕈᑦᑎᒍ ᑕᐃᒫᒃ ᑭᓯᐊᓂ ᐅᑎᕐᑎᒍᓐᓇᕐᑕᕗᑦ ᐃᓚᐃᓐᓈᕐᑕᐅᑦᑕᐃᓕᒪᓂᖅ ᖃᓄᐃᙱᓪᓗᑕ ᐊᒻᒪᓗ ᓇᓗᖅᑯᑎᙱᓂᕐᓴᐅᓕᕐᓗᑎᒃ ᐃᓄᐃᑦ.

ᑕᒪᕐᒥᒃ ᐊᒻᒪ ᑕᐃᒫᒃᑎᐊᖅ ᐊᑐᓕᕐᑎᑕᐅᓗᓂ ᓄᓇᕗᖕᒥ ᐊᖏᕈᑕᐅᓯᒪᔪᖅ ᐊᒻᒪ ᓴᐳᑎᓯᒪᓗᒋᑦ ᐃᓄᐃᑦ ᐱᔪᓐᓇᐅᑎᖏᑦ ᓇᓗᓇᐃᖅᑕᐅᓯᒪᔪᑦ ᓄᓇᕗᖕᒥ ᐊᖏᕈᑎᓂ ᑖᓐᓇᓗ ᓄᓇᕗᑦ ᑐᙵᕕᒃᑯᓐᓄᑦ ᐱᓕᕆᐊᒃᓴᐅᖃᑕᐅᖕᒪᑦ ᐱᓕᕆᐊᖑᐃᓐᓇᐅᔭᕐᓂᐊᕐᑐᓂ ᐊᒻᒪ ᑲᒪᒋᔭᐅᖏᓐᓇᕐᓗᓂ.

ᑐᑭᓯᓯᒪᒍᑎᑦ ᐱᔾᔪᑎᖃᖅᑐᑦ ᓄᓇᕗᑦ ᑐᙵᕕᒃᑯᑦ ᑎᓕᔭᐅᔾᔪᑎᒋᓯᒪᔭᖏᑦ, ᓯᕗᓪᓕᖅᐹᖑᑎᑕᖏᑦ ᐊᒻᒪᓗ ᐱᓕᕆᐊᖏᑦ ᑕᑯᔭᐅᔪᓐᓇᕐᐳᑦ ᐃᑭᐊᕐᕆᕕᖓᓂ ᐅᕙᓂ www.tunngavik.com